اسراء کے لغوی معنی رات کو چلانے یا لے جانے کے ہیں یعنی راتوں رات نبی کریم کا مکہ سے بیت المقدس تشریف لے جانا ہے۔ معراج کا لفظ عروج سے بنا ہے جس کے معنی بلندی اور اوپر اٹھنے کے ہیں۔

“پاک ہے وہ ذات جو ایک رات اپنے بندے کو مسجد الحرام سے مسجد اقصیٰ تک لے گئی جس کے اردگرد ہم نے برکت رکھی ہے تاکہ ہم اسے اپنی نشانیاں دکھائیں۔ بے شک وہی سننے والا، دیکھنے والا ہے۔” (سورہ بنی اسرائیل: 1)

ایک رات، طائف سے واپسی اور ہجرت سے ایک سال قبل، حضرت جبرائیل علیہ السلام براق لے کر تشریف لائے۔ براق ایک ایسا جانور تھا جو گدھے سے بڑا اور خچر سے چھوٹا تھا، اور اس کی رفتار اتنی تیز تھی کہ ہر قدم حد نگاہ تک ہوتا تھا۔ (صحیح بخاری، حدیث نمبر: 3207)

اس وقت آپ صلی اللہ علیہ وسلم خانہ کعبہ کے حطیم میں آرام فرما رہے تھے۔ حضرت جبرائیل علیہ السلام نے آپ کو نیند سے بیدار کیا، زمزم کے پاس لے گئے، اور آپ صلی اللہ علیہ وسلم کا سینہ چاک کر کے قلب اطہر کو سونے کے طشت میں رکھا، جو ایمان اور حکمت سے بھرا ہوا تھا، اور اسے پاکیزہ ترین بنا دیا۔ (صحیح مسلم، حدیث نمبر: 162)

پھر آپ براق پر سوار ہو کر حضرت جبرائیل علیہ السلام کی معیت میں بیت المقدس تشریف لے گئے۔ وہاں آپ نے براق کو اس حلقے کے ساتھ باندھا جس سے انبیاء کرام اپنی سواریاں باندھتے تھے۔ (سیرت ابن ہشام، جلد 1)

مسجد اقصیٰ میں داخل ہو کر آپ نے دو رکعت نماز ادا کی اور انبیاء کرام کی امامت فرمائی۔ (زاد المعاد، جلد 1)

حضرت جبرائیل علیہ السلام نے آپ کے سامنے دو برتن پیش کیے، ایک میں شراب اور دوسرے میں دودھ تھا۔ آپ نے دودھ کو پسند فرمایا۔ حضرت جبرائیل علیہ السلام نے فرمایا: “آپ نے فطرت کو پا لیا، آپ کو اور آپ کی امت کو ہدایت نصیب ہوئی۔ اگر آپ نے شراب پسند کی ہوتی تو آپ کی امت گمراہ ہو جاتی۔” (صحیح مسلم، حدیث نمبر: 162)

کچھ روایات کے مطابق آپ کے سامنے تین برتن پیش کیے گئے تھے، جن میں دودھ، شہد، اور شراب شامل تھے۔ (زاد المعاد، جلد 1)

کتاب “نور سے نور تک” (ص: 214) کے مطابق، ابن اسحاق نے بیان کیا: “مجھ سے ایک ایسے شخص نے روایت کیا جسے میں جھوٹا نہیں سمجھتا۔” حضرت ابو سعید خدری رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: “بیت المقدس میں جو کچھ ہوا، اس سے فارغ ہونے کے بعد ایک سیڑھی لائی گئی، جو نہایت خوبصورت تھی۔ یہی وہ سیڑھی ہے جس کی جانب تمہارے مردے موت کے وقت اپنی آنکھیں کھولے دیکھتے ہیں۔ پھر مجھے اس پر چڑھا دیا گیا۔ (واللہ اعلم) یہاں تک کہ مجھے آسمان کے ایک دروازے ‘باب الحفظہ’ (نگہبانوں کا دروازہ) تک پہنچا دیا گیا۔”